Utklippet nedanfor er tatt frå Hufvudstadsbladet i Helsingfors, hovudorganet for ‘Svenskfinland’.

Det interessante her er ikkje berre innhaldet, men sjølve det faktum at i Finland kjem kritiske røyster til orde i dei største avisene, i motsetnad til t.d. Aftenposten og Klassekampen.

Men vi ser frå lesarinnlegget det same som vi ofte ser i Norge, at klimaaktivistar ikkje tør å stille til debatt mot spesialistar frå ‘den andre leiren’.

Nei til EU’s klimakonferanse 30. oktober

Nyleg såg vi dette i den store klimakonferansen som Oslo Nei til EU, Grünerløkka NtEU og Ungdom mot EU arrangerte i lag på Thon Hotel Slottsparken den 30. oktober.

Emnet var ikkje menneskeskapt oppvarming eller CO2-hypotesen, langt ifrå, den vil ikkje Nei til EU rokke ved (i denne omgangen). Emnet var det såkalla grøne skiftet, med tittelen «Vel EU falske grøne løysingar for sin klimapolitikk, og kva vil skje med den norske vasskrafta?»

Vi som var til stades, fekk høyre ein rad grundige førelesingar av spesialistar på sine område; mellom anna tala Aina Bartmann om GMO, EU og agroindustrien; Frida Kieninger frå Food and Water Europe om ‘The Hydrogen Hype’ og sivilingeniør Ole Kristian Setnes om ‘Blir EU’s klimaplan ein trussel mot naturen?’ Setnes er òg styremedlem i Nei til EU og leiar av Grünerløkka NtEU.

Her er ikkje plass til å gå inn på det konkrete innhaldet i alle desse studiane, og det torde vera vel kjent for faste lesarar av derimot.no. Men det vart veldig greitt og grundig vist, at sol, vind og hydrogen, med teknologien i dag, aldri kan erstatte dei tradisjonelle energikjeldene. Dei er rett og slett dårleg propaganda, for å roe ein oppskremd opinion, så dei politiske leiarane kan posere som handlingskraftige, at dei ‘gjer noko’!

Dette er for så vidt også kjent nok, men det som vekte meir oppsikt, var at miljørørsla glimra med sitt fråvær. (Det var berre éin ungdom i salen, men laurdag morgon er kanskje eit dårleg tidspunkt for miljøungdommen?) Absolutt alle miljøorganisasjonar i Norge var inviterte, men ingen, zero, null, av dei turte å møte opp, for å drøfte den harde, konkrete røynda bak krava deira.

Edvard Mogstad, nestleiar i Østfold NtEU